Os parentes SCG

Festa na Casa do Gil. 2ª parte.

2012-01-31T19:52:00.000+01:00

Frío

2012-01-30T20:50:00.000+01:00

Seica vén unha onda de frío, os marranquiños xúntanse para aproveitaren mellor a calor, supoñemos que será instinto animal,ou tamén puido ser que os ensinase a súa nai. Non sabemos.

Final do xantar na Aira de Baixo no 93

2012-01-29T15:42:00.001+01:00

Disque os que cantan despois de xantar son máis de fiar. Aquí os galegos e os bercianos xuntaron a Rianxeira coa Encina, o himno galego, ai Carmela... e Adiós con el corazón

E Final:

Lobelle 1991. Comunión

2012-01-25T15:30:00.001+01:00

En Lobelle en 1991. Comunión da Alba. Vai dedicado á Noemí que tan ben o pasou cos vídeos anteriores. Pois neste sae ela moi guapa

O Padriño: como organizar unha festa galega

2012-01-24T22:40:00.002+01:00

Aira da Casa de Baixo 1993. 2ª parte.

2012-01-23T22:29:00.002+01:00

Fumeiro do ano

2012-01-21T19:33:00.000+01:00

Ten boa pinta o fumeiro da Casa de Baixo deste ano

1993, aira da Casa de Baixo, moita familia

2012-01-20T23:34:00.002+01:00

Xeneira

2012-01-18T15:54:00.001+01:00

En Xaneiro os gatos andan á XANEIRA, seica é época de celo das gatas, pero o Dado ten unha galleta na boca que parece que é máis interesante a tal hora que iso de andar por riba dos tellados atras das gatas...

Neve

2012-01-15T16:31:00.002+01:00

Disque hoxe pode nevar. Pois en 1995 si que nevou, como se pode ver no antigo vídeo do noso reporteiro

Buciños

2012-01-15T12:12:00.000+01:00

Hoxe ten unha páxina para el na edición galega de El País. É o noso veciño e amigo Manolo de Buciños. Un dos grandes na escultura galega. Poden lelo aquí. A foto é do mellor fotógrafo de Galicia, Xurxo Lobato. O texto dunha catedrática de historia da arte, Victoria Carballo-Calero

Actores coñecidos que triunfan

2012-01-13T23:08:00.000+01:00

O mércores estrenou Telecinco La Fuga, unha serie con moito éxito de audiencia. E alí vimos facéndoo tan ben coma sempre á nosa parenta da Barrela María Vázquez ou ao compañeiro de estudos do Xan Luís Iglesia (aínda que é máis coñecido polo papel de Matalobos)

Vanse acabando as matanzas

2012-01-12T20:02:00.000+01:00

Hai vinte aniños xa deste vídeo

As "cabras"

2012-01-07T20:25:00.001+01:00

Por aquí a xente chámalles cabras, andan a pasear ao lado de Lobelle, estas non fan tanto dano coma o xabaril e son máis bonitas

Visitantes deste blog

2012-01-06T18:37:00.002+01:00

Desde o 1 de xaneiro de 2010 (alá van dous anos) este blog tivo 11.000 visitantes que miraron unhas 15.000 páxinas. Saúdos para todos eles e aquí estamos para este ano.

Día dos "Reises"

2012-01-05T22:08:00.000+01:00

Os Reis deixáronnos nunha bota no Arransallo este vídeo caseiro do ano 1990, da vendima da Casa de Baixo

San Manuel

2012-01-01T10:33:00.002+01:00

Empeza outro ano, o 2012. Que veña en paz. E empeza coma sempre co santo dos Manueles, felicidades para eles e os José Manueles, especialmente para o Manolo do Tío Bernardo.

Canto ao ano cadaquén verao como lle vaia a el. Coma este carballo. Segundo onde o mires podes ver un carballo torto ou un carballo retorto, se vas de Trasar á Estivada ves unha cousa, se vés ves a outra, e todo iso sen baixarse do coche.

O invento da Tita

2011-12-29T20:14:00.000+01:00

Sempre a Tita tivo moita arte para atar chourizos ben e axiña. Agora aínda mellorou a técnica. O Alfonso facilitoulle un sarxento (gato que usan os carpinteiros para amarrar a táboa ao banco) que lle serve para ter conta do fío e ata con tanta rapidez que o chourizo saíu movido (aínda que semella haber un plástico son efectos do movemento). A pataca que está ao lado ten un prendedor para picar a tripa e sacar as bolsas de aire.

2011-12-28T08:27:00.001+01:00

Comentabamos onte que as nosas vacas están sempre coa radio posta e o ben que lles vai así. Mais ás veces pasan cousas raras, coma hoxe 28 de decembro. Resulta que na primeira munxidela da mañá detectamos unha merma de máis dun litro por vaca, cousa moi rara, moi rara. Polo que fixemos unha reunión de urxencia e chagamos á conclusión (despois de lle mirar ben os ollos ás vacas) de que todo se debeu a que onte continuamente na radio falaron de que un tal KIKO e unha tal JESSICA romperan os seus amores e,claro, as vacas tamén teñen o seu corazonciño que estaban ilusionadas primeiro co meniño que ía vir, logo co casamento e agora nada de nada. Aínda non sabemos moi ben como solucionar o problema. Igual botándolles na ración diaria uns quilos máis de peghotín lles volve o humor (peghotín: esencia concentrada de ilecencia)

As vacas e a música

2011-12-27T11:55:00.000+01:00

Xa temos contado aquí que nós sempre lles deixamos a radio posta con música ás vacas porque así están máis tranquilas e asústanse menos a calquera ruído. Temos dous ambientes. As que están producindo leite escoitan Cadena Cien. As xovencas e as secas escoitan a Radio Galega.

Para que vexan como as vacas aprecian a música vailles este vídeo de internet:

A figadeira na Casa de Baixo

2011-12-26T17:10:00.002+01:00

Estes días andamos coa figadeira que é como se lle chamaba aquí á matanza pola moita lei que se lle tiña ao fígado encebolado que se comía no xantar. Fígado recén sacado e cocido de porco do ano anterior. Á noite callos. No segundo día costela guisada e frebas. O día dos chourizos zorza na pota ou na tixola con cachelos. E en todas as comidas algo de pito de curral para que fora festa.

Así que aquí onda nós o día forte é o primeiro, o da figadeira, matanza, mata, matalota... Noutros, coma alá na Cervela onde estivo moitos anos o noso tío José, o día principal é o segundo, o da parta ou sala.

Para isto da matanza hai moitos nomes. Nós facemos o chourizo e o chirimbol, chofre, boche ou lixeiro, chourizo de segunda que na Cervela eran choulán e en Sarreaus seica é chourela. O que sí é que cando son feitos na casa sempre están ricos chámense como se chamen. E agora tamén se fan salchichóns, chourizos tipo Revilla, androias, botelos, lombos adubados. Se a todo isto lle sumamos os xamóns, os lacóns, as lacoeiras, o fuciño, as patas, os riles, a lingua, as filloas, a cachucha, os sesos, as tripas, o rabo, as orellas, os dentes, o raxo, o solombo, o touciño, etc. Cantas cousas se perden os que non comen porco por motivos relixiosos, porque non lles gusta ou porque llelo tirou o médico!

Boas festas

2011-12-23T17:56:00.001+01:00

Os Parentes desexámoslles unhas felices festas de Nadal e Aninovo a todos os seguidores deste blog e especialmente á familia do Pedro que está alén mar

A vella moto

2011-12-19T23:14:00.000+01:00

A Moto do Sr. Cura está un pouco descoidada, pasando o inverno temos que tentar dela

A leña das devesas

2011-12-11T22:12:00.000+01:00

Antes a leña era moi buscada e tiña moito valor porque supoñía ter con que quentarse no inverno e ter con que quentar o forno do pan. Por aquí quen podía tiña unha devesa que coidaba con agarimo. A mellor leña para o lume era a de carballo. Para arados e carros os bidros ou bidueiros, e tamén para algunhas partes os amieiros.
Un noso correspondente mándanos esta foto dunha aldea portuguesa alá por Bragança: ninguén que non sexa do lugar pode levar leña dos sitios colectivos; quen non o respecte será castigado.

O día das Conchas

2011-12-08T14:42:00.000+01:00

Na nosa familia houbo sempre moitas Conchas. Na casa do Gil a Concha nai e a Conchita filla. Na casa do Tío Bernardo a tía Concha que foi madriña de moitos e tamén era a encargada de buscar os nomes para os meniños. E a tía Concha da casa do Guerra que veu de Arxentina, e a... Agora xa non se lle chama Concha ás nenas, nin Concepción nin Inmaculada. Menos mal que a nosa curmá menor é Inma e vai gardando o nome.

O Cantón, o mellor sitio para tomar algo en Chantada

2011-12-04T22:52:00.000+01:00

Abriu o Manuel O Cantón en Chantada, un sitio agradable e ben atendido para tomar un piscolabis. Alí fixo este cafe cortado de deseño o Damián, que é todo un mestre cafeteiro.

Carballo singular

2011-12-02T20:19:00.001+01:00

Este curioso carballo atopámolo de camiño da LIOBA, finca que queda entre os dous Trasares. É curioso como sae todo da mesma raíz, a natureza tamén sabe moito de enxeñería.

Actos de homenaxe no Incio ao médico paseado

2011-11-27T20:15:00.000+01:00

Alá estivemos Os Parentes. Grazas ao profesor e poeta Claudio Rodríguez Fer por nos mandar o poema e a foto do acto.

Mantiña a dignidade a todo custo
...e intentaron humillalo por iso.

Abría as portas ao progreso
...e intentaron encadealo por iso.

Sandaba enfermos coa súa ciencia
...e intentaron torturalo por iso.

Atendía de balde aos pobres
...e intentaron liquidalo por iso.

Daba vida curando do mal
...e intentaron matalo por iso.

Porque era pródigo
en ideais republicanos
ficou vivo entre os seus
como o cabalo branco
da lenda dos libres.

Apenas escribiu versos,
pero era un poeta integral.

E quixeron matalo tanto
que xa nunca poderá morrer.

Todo el forma parte desta terra
que o enterra en todas partes.

Chamábase Manuel Díaz.
Era médico do Incio.

Agora chámase Galicia
e é a saúde do pobo.

Claudio Rodríguez Fer

Os pitos da Lina

2011-11-26T17:18:00.000+01:00

Os pitos da Tía Lina ben que o pasan no novo galiñeiro, en días soleados como o de hoxe dá gusto velos, e eles que son agradecidos regaláronnos uns quiquiriquí ben entoados en agradecemento de saíren na foto

O Pequeniño do Incio

2011-11-21T23:24:00.000+01:00

Os vindeiros sábado e domingo hai no Incio unha homenaxe ao famoso médico que foi paseado. Como gozaría o noso tío, empacestea, o Cura do Incio asistindo a eses actos. Deixamos aquí o programa

O toco do raposo

2011-11-20T16:58:00.000+01:00

Non sabemos se é "microtoponomia". O caso é que ao eido da foto chámanlle os buratos dos zorros, despois de non visitala dende a recollida da herba seca de segundo corte atopámonos con este burato que supoñemos que o fixo o zorro.Entendemos que o nome da finca lle está acertado

O Manu na Solaina

2011-11-18T22:53:00.001+01:00

Pois na Solaina da TVG do mércores 16 tocaron uns excelentes músicos e alí estaba Manuel González (o neto do Manolo de Trasar). Teñen futuro, si señor. Se non teñen tempo a ver todo o programa vaian xa ao minuto 11:30

O viño vello

2011-11-18T18:16:00.001+01:00

En setembro e outono, bebe o viño vello e deixa estar o novo. Iso di o refrán e non lle falta razón. Como xa estamos en novembro o Xan bebeu hoxe a última botella da colleita 2010. Agora xa lle toca ao novo que este noso viño ribeirao é moi rico pero no seu tempo. Aí lles queda o retrato da derradeira botella para que poidan brindar na internet (que non emborracha e pódese coller o coche sen medo)

A besta

2011-11-16T15:54:00.000+01:00

A casa do Penete, a casa do Gil, a casa do Tío Bernardo, a casa de Baixo (matriz dos Parentes) tiñan besta (egua) para ir ao muíño, para ir á ribeira, para viaxes e visitas familiares. Ollo, que non todas as casas tiñan besta, habíaas que tiñan burro e outras nin besta nin burro. Algunhas tiñan cabalo.
Esta escultura parece lembrar a besta da Casa de Baixo un día de matanza cando se levaban as vacas a Burgás e a besta ía cargada de rapaces.

As vellas cubas

2011-11-11T23:57:00.000+01:00

As vellas cubas fixeron o viño moitos anos. Agora xa temos cubas de aceiro, que o viño non colle mal sabor e son moi fáciles de limpar. Mais hai quen coma o Xan lles dá un novo uso, servindo de arcas para gardar o millo debullado.

Fotos do curmán Bernardino

O Pedro e a becerra que come galletas

2011-11-10T18:42:00.000+01:00

Á becerra gústanlle as galletas, só ten que escoitar o asubío e xa está cotifando no Pedro para comer algunha. Temos que saber se as galletas axudan a que dea máis leite, ela vese contenta e gordiña, gustar gústanlle.

O Pedro veu reforzar Os Parentes que non daban feito o traballo.

O Porco bravo anda a facer das súas nas leiras onde sementamos herba e non só se dedica a chocar co coche so Presidente do país.

O primeiro cura da Casa dos Curas. Segunda parte

2011-11-06T22:22:00.002+01:00

Historia de don Ángel González Fernández. Despois de publicarmos na entrada anterior un documento que reproduce unha revista do Centro Galego de Barcelona de principios do século pasado, hoxe aportamos máis información baseada na memoria do seu tatarasobriño Manuel González.

Cando marchou para Cuba seica o barco saíu da Coruña pero os ventos non viñan a xeito para as velas e tres meses despois en lugar da Habana o barco volveu amarrar no porto coruñés. Mais el xa non baixou e volveuno tentar e conseguiuno.

Debeu facer moitos cartos en Cuba, porque mercou alá unha finca. Despois de se vir para España volveu o sobriño Benigno a Cuba e vendeuna por 12.000 dólares. Disque lle contaron ao Señor de Cartelos que don Benigno viña rico de Cuba e el respondeu que por moitos cartos que trouxera non se ía librar de ser caseiro do Señor de Cartelos. Pois daquela o tío Benigno meteu no Pastor 100.000 pesetas ao 6% (un capital neses tempos).

Cando foi preso este tío Angel (ver o documento do outro día) estivo a piques de ser axusticiado, pero a muller do xefe dos insurrectos díxolle ao home: e como ides matar a don Ángel, co bo que é e o ben que se porta cos nosos fillos. E el deulle unha capa e deixouno marchar.

Monolo González lembra que sendo neno lle deu 2 pesetas de prata en Chantada e logo na casa non llo crían, pensaba a Mamacarmen que llas collera el.

Hai na casa unha foto con esta lenda:

Esta trangeta esydentica a como fuevistido paralasepultura fue como el tenia dicho que queriaqueloenterraran con avitos del coro de Barcelona. Murio el 18 de febrero de 1940 alos 95 años de edad

O primeiro cura da Casa dos Curas

2011-11-04T18:26:00.001+01:00

Mándanos a tía Lina este documento sobre o primeiro cura da Casa do Tío Bernardo. Non sabemos como chamarlle porque era tío do noso tataratío don Benigno. Era don Angel González Fernández

Malos tempos para os gandeiros

2011-11-02T22:57:00.000+01:00

Os sindicatos Unións Agrarias (UU.AA.), Xóvenes Agricultores (XX.AA.) e Sindicato Labrego Galego (SLG) advertiron este mércores de que o 90% das explotacións de leite galegas se atopan "ao límite" e estimaron que a perda acumulada este ano para un produtor medio --dunhas 200 toneladas de leite-- superará os 15.000 euros.
Nunha rolda de prensa conxunta, as tres organizacións agrarias chamaron a atención acerca de que o sector leva máis de dous anos e medio nunha "situación crítica" e afirmaron que os produtores recorreron a fondos propios e ao endebedamento, pero tamén chegaron ao límite.

Ver a nova completa no Galicia Hoxe

Día dos magostos

2011-10-31T15:55:00.000+01:00

Agora á xente dálle por celebrar a americanda esa do Halloween ou recuperar a máis nosa do Samaín. Aquí onda nós o día 1 era o día dos magostos. E o día de visitar o camposanto o día 2. Pero os mundos cambian. O outro día entramos nun supermercado e estrañounos ver este expositor con candeas e velas a pilas para os nichos... e pensamos nós... e que vai compar unha vela a pilas... pois hoxe pasamos polo mesmo sitio e da morica de velas a pilas xa só quedaba unha.

Así que a ver se mañá gobernamos un magostiño aínda que sexa con viño vello, que o deste ano aínda está algo verde e anda entre os 10 e 11 graos.

Nabos

2011-10-30T19:55:00.000+01:00

Algúns nabos naceron, estes da foto son do eido dun veciño, agora só teñen nabizas, logo virán os grelos e a carola

Visuña e o tío Bernardino

2011-10-28T16:02:00.001+02:00

Lemos hoxe na Voz de Galicia (ver noticia) algo sobre as minas de Visuña no Courel. E acordámonos do noso tío Bernardino González Lamas (nado en 1906, + en 1938). Foi o cura de Visuña, e tamén debía levar o fermoso lugar de Ferramoulín (a peor parroquia da diócese de Lugo, segundo o tío Anxo do Incio.) Enfermou alá e foino buscar seu irmán José (o noso avó), a quen lle cobraron dous pesos desde a Estación de San Clodio polo axudar a ir alá. Nestas montañas cando lle facían ovos, untábanllos con graxa por enriba. Logo foi para Castro Caldelas porque concursou por Ourense e acompañouno a irmá Estrella. Despois foi operado en Vigo e sacáronlle un riñón, pero non foi nada porque tiña “tuberculosis á sangre”, só durou dous anos.

O can, o gato, o rato

2011-10-27T22:59:00.000+02:00

Disque o can se leva sempre mal co gata, disque o gato sempre que pode papa o rato... pois neste vídeo que pillamos da rede non hai tal cousa. Pois se os bechos se poden levar tan ben aínda sendo ben distintos, por que non pasará o mesmo coas xentes?

CHOVE!!!!!!!!!!!!!

2011-10-24T22:08:00.001+02:00

QUE SI, QUE CHOVE!!!!!!!!!!!!!!!!!!!!!!!!!!!!

Castañazo

2011-10-22T14:46:00.000+02:00

Vén aí o castañazo de Cahantada e o grupo de amigos da Carmen montaron este vídeo tan xeitoso coa figura dunha duquesa que todos coñecen. Moi divertido

Pisón

2011-10-19T22:44:00.000+02:00

Andamos laboreando a terra, facemos mioto po, pero imos preparándonos para a chegada do inverno. Este aparello é un pisón deseñado polo Carlos en Lugo. Leva dentro uns 3.000 kg de auga. E ben cómpre tal e como está o chan de seco.

Lume, lume

2011-10-17T15:13:00.000+02:00

Arde por todos os lados, só vemos fume estes días, a ver se As San Lucas deixan unha pouca de choiva, prevista non está, pero pode ser un milagre

Comida para os porcos

2011-10-15T12:54:00.003+02:00

Este ano di o Xan que van saír moi ricos os chourizos da Casa de Baixo porque os porcos van comer ben. Seica a remolacha a papan que dá gusto. Pero non se pode abusar dela porque a señora Luísa de Padroso como tiña tanta remolacha e a comían ben ... pois resultou que os porcos eran moi februdos e os chourizos logo non tiñan moita gracia... e achacáronllo á remolacha. O bo de cebar porcos é que comen de todo e nas casas sempre hai sobras... que van á caldeira dos porcos se non valen para o can ou o gato.Todo isto xunto chámase "lavaduras" e xa di o refrán "en que pensas porco? -nas lavaduras"
Por iso hai xente que, con toda a boa intención, cando lle insisten coa comida a alguén doutra casa lle din: come burriño, que total vai para os porcos.

Eloy Varela, da Barrela

2011-10-14T15:42:00.000+02:00

Eloy Varela criouse na Barrela onde estaba destinado o seu pai. Agora vive en Pontevedra ensinando matemáticas en Marín. Pero tamén fai películas, desas que duran pouco. Xa ten dúas. Poden velas, merecen a pena moito máis que a maioría dos programas de televisión (menos o Padre Casares e o Matalobos). Poden velas aquí.

Se dispoñen de 20 minutos miren esta señora que papelón fai:

Dúas letras from evarela on Vimeo.

De raios e augas

2011-10-13T15:59:00.000+02:00

Segue a seca tan longa deste ano. Hai que buscar auga debaixo das pedras. E a que non saben quen nos pode axudar a facer de zahorís? Pois as tronadas. Parece curioso pero tamén os raios son zahorís, buscan sempre conexión con vetas de auga soterradas; cando vexa unha árbore queimada dunha chispa pense que debaixo é fácil que estea un manancial.

(os consellos do zahorí dos Parentes)

Empranganado, mandil e mandileta

2011-10-12T13:51:00.001+02:00

Acordounos esta palabra, empranganado, que dicía moito a consogra da Pilar, empacestea a Pastora. Dise estar empranganado por estar atascado nunha cousa, que non se dá saído diso. No noso dicionario non demos atopado a palabra, igual era que non miramos ben.

E seguindo coas palabras a Mamacarmen sempre tivo mandil e mandileta.

Mandil: prenda que utilizaba para se cubrir da chuvia e do frío, que cubría as costas e a cabeza

Mandileta: prenda que ataba á cintura para protexer a roupa mentres traballaba (o que o dicionario di que é un mandil)

Son xeitos de falar o galego por aquí onda nós. Se alguén pode engadir algo, que faga un comentario e aprendemos todos.

San Froilán

2011-10-09T15:44:00.000+02:00

Festas en Lugo, o San Froilán. Polbo nas casetas e visita a Pelúdez e a señora Filomena

Festa da Pilar

2011-10-09T00:05:00.000+02:00

Pois como cadra no medio da semana o día do Pilar adiantouse a festa ao sábado. Fixo a Pilar un cocidiño e gobernou un pito, todo moi rico. Rodeada da familia. E tamén unha festa internacional porque estiveron unhas mozas e un mozo daneses que están de intercambio en Chantada e viñeron acompañando a Helena. Desde a páxina dos parentes felicidades para a Pilar e saúdos para os daneses e as súas familias. A foto do Bernardino deixa memoria do asunto.

Nabo

2011-10-08T09:01:00.002+02:00

Pregúntanos don Xesús Ferro, que debe ser o home máis ben falado de Galicia, polo cultivo dos nabos. Velaí vai o que sabemos.

Cando nós eramos nenos,os nabos sementábanse a finais de agosto na terra que fora de patacas e tamén nas nabeiras (nabeiras son os eidos mellores para botar o millo e patacas, leiras os eidos peores para botar o pan) que tiñan millo antes de recollelo e no medio da ferraia (centeo verde), nacían coas primeiras choivas e recollíanse segundo cumprían para cebar os porcos, e tamén en caso de necesidade para as vacas; a estas cando estaban paridas cocíaselles un pouco de nabos con fariña.

Alá por Taboada, na terra da avoa Servanda, tiñan moito coidado da lúa e a choiva, nos días San Lourenzo (10 de agosto). Alí tiñan sitios chamados da podrea; era un eido no que só se botaban nabos e tíñase a terra preparada e estercada todo o ano. Desa podrea saían os mellores nabos.

Din os entendidos que o nabo se sementa na lúa chea de agosto, para que non se saian pronto. Ó arrefriar o tempo é cando se saen os nabos. Máis que o mes concreto depende do tempo que veña.

Transplántase algúns nabos e soben para arriba, é a nabiña: cando bota a flor e despois bota a semente. Poñíaselles uns paus para facer como un palleiro que a protexese dos paxaros. Dicía un señor de Trasar que ás veces cando había unha muller parida e non se topaba verdura mesmo se lle botaba man ás pequeniñas nabizas da nabiña.

Recordamos nós que en tempo de nevadas grandes (toradas), íase por nabos para a ceba e tiñamos que sacalos de debaixo da neve. Ós porcos cocíaselles nun pote grande cada dous ou tres días, a carola do nabo un pouco picada.

Non temos moita idea de darlle as nabizas ás vacas, pero supoñemos que ó non ter nada de verde en pleno inverno botaríase man ás nabizas para complementar a herba seca e a palla que eran o alimento básico cando non podían saír ó monte. Con este tipo de alimentación as vacas producían menos leite pero máis rico en graxa, ideal para facer queixo. Na primavera como xa tiñan pastos e ferraia aumentaba a produción e baixaba a calidade do leite.

A nabiza é a rama que bota o nabo, os grelos saen no medio das nabizas antes de saírse (floración) xa pasando o inverno e tirando á primavera. Aquí eran moi apreciadas para o caldo, dise que o mellor caldo é o da nabiza. Hoxe moita xente ao vender fai pasar a nabiza por grelo, colléndoas pequenas e cortadas. Os grelos tamén saben ben no cocido, con lacón, con chourizos. Non se poden confundir os grelos (do nabo) coas grelas (da col, das verzas que se saen).

Coas carolas facíanse carrelos para xogar os rapaces nas noitiñas en que no inverno non había que facer.

Tamén se di que os que sobran fan grande esterco e para ben ten que estar xa o nabo na flor, que xa se pasase o grelo. Antes había xente que collía a flor e cando secaba vendíana nas feiras para semente.

Da colza por aquí non temos noticias, nunca a sementamos que se saiba.

“ a maior potencia nabal está en Lugo”

Dise que nabo, nabiza y grelo, tres personas distintas y un solo dios verdadero.

Agosto nubrado, nabo furado, tamén se di.

Ollo que a semente do nabo e a da col son case iguais e moitas veces se teñen confundido se non se marcan. Este ano vai haber moi pouco nabo porque non choveu no tempo e naceron poucos. Aínda que nazan agora xa é tarde e a nabiza ha vir xa con moito frío.

Tamén nos acorda que antes se vía xente maior co papo moi grande e disque era o bocio e que comer demasiadas nabizas que non axuda a mellorar. Pero nós non somos médicos, nin tampouco veterinarios. Só somos xente do campo.

Abur, don Xesús!
(foto de nabizas no murteiro da Pilar ben comidas polos paxaros)

Unha sebe tres anos

2011-10-04T16:53:00.001+02:00

Unha sebe 3 anos

Un can tres sebes

Unha besta tres cans

Un home tres bestas

Un corvo tres homes

Iso nos dicían antes aos pequenos para que aprenderamos a duración dos animais... aínda que no caso dos corvos é ben esaxerado.

Algo parecido nos manda a Ana María:

O primeiro día Deus criou a vaca e díxolle: terás unha vida dura, traballarás para o labrego, tirarás do carro, deixarás que che saquen todo o leite que deas… e vivirás 60 anos. A vaca respondeu: señor para esa vida chéganme 20 anos , queda cos outros 40.

O segundo día Deus criou o mono e díxolle: terás que vivir pendurado das árbores, divertirás aos homes facendo toda clase de parvadas e poñendo todo tipo de caras e vivirás 20 anos. O mono respondeu: grazas Señor, para esa vida chéganme 10 anos, regáloche os outros 10.

Ao terceiro día Deus criou o can e díxolle: terás que botar a vida sentado diante da porta do home e ladraraslle o todo o que se achegue molestando a todos os que están arredor … e vivirás 20 anos. O can respondeu: grazas señor, pero para levar esa vida chéganme ben 10 anos, eu fago coma o mono, podes quedar cos outros 10.

Ao cuarto e último día Deus criou o home e díxolle: ti non traballarás, vivirás ben, comendo, durmindo, viaxando, vivindo sen facer nada. E concédoche 20 anos de vida. E o home contestou: Señor, 20 anos de tan boa vida é moi pouco, non me chega a nada. Como che sobraron 40 anos da vaca, 10 do mono e dez do can, damos todos a min. Así con 80 anos xa merece a pena.

E Deus concedeullo:

E por iso o home pasa os primeiros 20 anos sen facer nada realmente, vivindo dos demais, sen traballar. Logo bota 40 traballando coma un animal, como unha vaca. Logo bota 10 facendo monadas para divertir os netos. E finalmente pasa os últimos 10 sentado diante da casa dándolle a lata aos que se lle achegan.

Dinamarca e Chantada

2011-10-01T15:09:00.001+02:00

Hai xa uns cantos anos que a cooperativa CHATACA (ICOS) organizou unha viaxe de traballo a Dinamarca. Un grupo de persoas apuntáranse: e ben que aproveitaron aquela viaxe, aínda hoxe a Pilar de Baixo ten moito que contar do mundo que viu. E agora a súa neta, a Helena, acolle de intercambio unha rapaza chegada de Dinamarca, nun intercambio que hoxe recolle La Voz de Galicia.

10 graos

2011-09-29T16:27:00.000+02:00

Iso parece ser o que terá o viño desta colleita de Oleiros. Alá cando estea feito o Xan e o Xosé convidan a probalo nas súas adegas, que por internet está máis complicada a cata.

Hoxe é o San Miguel, festa en Buciños, cantas veces fomos de nenos xantar alí a carne e o polbo. O Xan de Baixo, en paz estea, ía xa de mañanciña para encargar a carne ao Cazolo, despois iamos o resto. Como nos prestaba comer de campo e que tristura cando chovía!

Saúdos para a xente de Buciños seguidora deste blog. Seica dicía o refrán: Carballedo, terrra de boas mozas, que en Buciños sonche roxas. E tamén: San Miguel das uvas, tarde vés e puco duras.

Ensila

2011-09-28T15:57:00.000+02:00

Andamos de ensila de millo, algún ten 3 espigas, pero non todo é coma o mellor

Apecear

2011-09-28T12:49:00.001+02:00

Outra palabra das de antes. Di Pilar Guerra (na foto na Illa de Ons no verán) que a súa tía Antonia (Quintela) dicía apecear co sentido de ir poñendo algo en camiño de se amañar ou rematar

Coñecen a palabra os seguidores deste blog?

Vendima

2011-09-25T22:34:00.000+02:00

Esta fin de semana tocou vendima, moitas e boas, agora toca esperar a que fermente para logo ver que viño sae

Os falares de Pilar Guerra

2011-09-24T20:22:00.001+02:00

Xa falamos aquí da publicación dos falares de Pilar Guerra nos Cadernos de Freseoloxía Galega 12. Agora a revista que dirixe o amigo dos Parentes don Xesús Ferro Ruibal acaba de poñelos na rede para que todos os poidan ler:

http://www.cirp.es/pub/docs/cfg/cfg12_14.pdf

A castañeira deste outono

2011-09-22T19:51:00.000+02:00

Polo de agora promete a colleita da castaña, claro que inda faltan días, e non se cumpriu o prognostico do que quere a castaña: en agosto arder e en setembro beber. Estamos soportando unha tempada de seca como non se acordaba hai anos, en xuño, xullo e agosto non choveu nesta zona practicamente nada e en setembro polo de agora tampouco, como din os vellos: se non chove máis ... nunca sequia veu comela.

Tecnoloxía

2011-09-22T14:37:00.000+02:00

Como poden ver na foto as nosas vacas poden gozar dunha tecnoloxía punta, nada menos que todo este aparello ... e para que... para mirar o corazón, as vísceras??? Non, só é para tratar as patas... miren se as coidamos ou non

web do Cura do Incio

2011-09-15T22:31:00.000+02:00

Igual alguén xa se decatou, porque non lle entraba a páxina do noso tío Anxo do Incio. Cambiou de sitio, agora está en http://www.anxo.info/donangel/

Vilagarcía

2011-09-15T09:29:00.000+02:00

En Carballedo tamén temos Vilagarcia,hoxe mandamos dende Os Parentes un propio na procura de mananciais. Saudamos os "villagarcianos" de Carballedo dende Os Parentes.

Acomellamar

2011-09-10T11:48:00.000+02:00

A nosa avoa, a Mamacarmen, dicía moito a palabra acomellamar, viña sendo algo así como acabar unha cousa que estaba a medias, axeitar algo un pouco escangallado. Alguén coñece tamén esta palabra?

Santa Eulalia de Tábara

2011-09-09T22:22:00.000+02:00

A que non saben onde queda iso? Pois élles alá cerca de Zamora, e alí hai unhas excavacións nun castro. Andan os que saben diso sachando na terra e limpando todo con cepillos e pinceis. Aínda han atopar cousas ben vellas. Este setembro volveu a Carmen traballar niso.

Santa querida

2011-09-09T07:34:00.000+02:00

Onte foi a Virxe do Faro, santa querida. A máis avogosa de todas, especialista en todo tipo de favores. A romaxe do Faro foi durante moitos anos a máis grande de por aquí, para a xente ese era un día santo, dos que non se traballa. E hoxe tamén é un santo moi importante en Buciños, o San Pegerto, tamén moi avogoso e único, non hai seica outro tal co mesmo nome en toda a cristiandade. Por iso moitos homes de Buciños e arredores levan o nome de Pegerto ou Pegertiño... antes, agora xa non está moi de moda o tal nome ...

Alexandre

2011-09-06T23:13:00.002+02:00

Hoxe as becerriñas foron alimentadas por Alexandre, disfrutamos todos da súa visita. Pode volver cando queira a facer prácticas co tractor, todo un artista do gando e da maquinaria

O Padre Silva

2011-09-04T11:09:00.000+02:00

Lemos nos diarios que morreu o Padre Silva, o de Ourense o da Ciudad de los Muchachos, o do circo. Cantas cousas fixo este cura sen sotana! Cantos rapaces recolleu e lles deu formación para que saísen adiante! O noso tío Anxo aínda lle levou algúns rapaces que non tiñan moito futuro para que arrincasen.

A Mamacarmen da Casa de Baixo sempre puxera a zorza en barreñós e cando romperon de vellos non se topaban. Menos mal que o cura do Incio arrincou co coche para a a Ciudad de los Muchachos e de alí volveu con dous barreñós. Aínda hoxe seguen acollendo a zorza todos os anos pola matanza. Igual ese é un dos segredos polos que os chourizos que fai a Pilar saben tan ben.

Quenpacestea o Padre Silva. Era un bo home aínda que quizais nunca o fagan santo!

Van rematando as festas

2011-09-01T13:28:00.001+02:00

Onte foi o San Ramón de Lobelle e non houbo festas. O día 10 e o 11 foi o San Lourenzo de Cartelos e houbo festa.

Esta fin de semana pasada foron as festas do Carmen en Chantada. No folión dos carros a chocolatería na que participaba a nosa Carmen levou o segundo premio. Aquí en Telvinte está:

O pregón das festas chantadinas foi cousa da amiga de varios dos Parentes Carmen Blanco. Saúdos para ela. (Televinte):

Reloxo

2011-08-29T10:40:00.000+02:00

Este é de sol, non e fácil de entender pero é bonito

Visita á Coruña

2011-08-24T21:58:00.001+02:00

Aquí está a Pîlar de Baixo diante do portal da casa da Maricarmen na Coruña. Fomos alá verlle o piso e pasarlle o péndulo, deu todo ben, que o disfrute...

Saúdos para a familia de Mila Fernández

2011-08-21T22:09:00.000+02:00

Hai unha semana reuniuse a familia Fernández alá por Santa María del Páramo (León). Un abrazo para todos eles, especialmente para o señor Baudilio que ben debeu disfrutar rodeado polos seus. Vén sendo a familia política do noso vicecurmánmaior Bernardino.

O raposo

2011-08-20T11:22:00.000+02:00

O Zorro anda a "minar" o Muíño Vello; contan que en tempos da guerra un veciño que era mestre seica fixo unha cova nesta zona para esconderse, despois din que foi utilizada un tempo por maleantes. Así a simple vista está mellor de localizar a que fixo o raposo estes dias, como está ao lado dun souto igual quere o pillabán gardar as castañas no toco para o inverno.

De galiñas, ovos e tomates

2011-08-19T16:05:00.000+02:00

Ao José da Torre-Cela sobrábanlle os tomates e déullelos ás galiñas e estas deixaron de poñer, el pensou que sería porque xa remataran a tempada de posta... pero en Bueu dixéronlle que galiña que come tomates deixa de poñer ovos. Así que será mellor gobernar os ovos na cociña e depois botarlles o tomate. A Marta, boa criadora de pitas poñedoras, di que non sabe nada diso de que os tomates acaban cos ovos.

Andar á revendía

2011-08-17T10:51:00.000+02:00

Lembroulle esta frase que se di moito por onda nós ao Curmán Maior Benigno. Non vén nos dicionarios pero si na internet onde o escritor Xulio López Valcárcel di tela escoitado pola zona de Lugo co significado de á porfía, á competencia (o mesmiño que se lle dá en Carballedo). O que si vén nos libros é unha moi parecida que ten sentido semellante: andar á revengueita. Así que por aquí andar/ir á revendía dise cando (facendo algo) se apura para ver quen acaba antes ou quen o fai mellor.

O que xa non temos tan claro é se escribila con b ou con v

Por decir viva san roque

2011-08-16T10:03:00.000+02:00

Por dicir Viva San Roque prenderon a meu irmán... e agora que o soltaron Viva San Roque e o can (popular)

Hoxe é San Roque, outro santo moi avogoso que nas imaxes sempre aparece ensinando unha perna na que ten unha chaga e acompañado dun can que leva na boca una anaco de ¿pan? Por iso debe ser o santo protector dos cans (haberá que lle dar ao noso hoxe un bocado extraordinario). E de paso, como tamén é santo ao que hai que recorrer no caso dunha peste... a ver se leva dunha vez esta peste de crise e trae a suba do leite.

Ademais hoxe en Carballedo, o noso concello, é día festivo que están coa patroa os Castro; aínda que para nós é un día solto (como dicían antes) porque a vaquería quere comer igual, non sabe de días santos.

Precioso poldro

2011-08-14T11:26:00.001+02:00

Naceu un cabaliño, 11 meses de espera pero mereceu a pena, é ben feito e a nai parece orgullosa... e o seu dono Efrén vese contento (o cabalo naceu aquí en Lobelle)

Vacacións

2011-08-13T22:32:00.000+02:00

Non todo vai ser apañar patacas. Tamén hai que viaxar. Aquí temos o Xan, a Mª José e a Vitoria en Bueu (moi cerquiña de onde tamén anda o señor Solana). Semellan estar atentos aos ladridos do cadelo Peg. Junior.

Patacas

2011-08-13T10:21:00.000+02:00

Tamén aproveitamos os días de vacacións para outros labores que a diario non hai tempo. Aí temos estas fermosas patacas recén arrincadas coa sacha polo Xan en Suashortas de Trasar. Teñen boa pinta para fritas

Vacas-vaca-ciós

2011-08-12T16:19:00.000+02:00

Xa andamos coas quendas das vacacións de verán. Boa falta fan as vaca-cións para esquecer uns días as vacas, que elas si que non teñen vacacións, pola contra tampouco traballan moito, o seu é comer e dar leite e cando fan ben as dúas cousas nós encantados

De cegoñas e comidas

2011-08-11T10:05:00.001+02:00

Moita comida debe haber nos prados cando segamos a herba para que as cegoñas veñan a ducias. Nada máis escoitar o tractor xa aparece algunha e despois veñen as outras. Fan coma os avións, dan un par de voltas de recoñecemente e logo baixan suavemente deixándose caer. Cando chegan as cegoñas xa sabemos de onde vén o aire, sempre se pousan na dirección do vento. O outro día chegaron dúas ou tres e de pronto desapareceron... que lles pasaría? non lles gustaría o cibaco? Pois dalí a pouco quen se pousou foi un deses paxaros que comen outros paxaros... escaparan por se acaso.

E falando de comida, como se pode ver, temos que separar os pensos porque non todas as vacas teñen as mesmas necesidades

Comida anual dos Parentes

2011-08-10T12:16:00.000+02:00

Este domingo día 7 foi a comida anual dos Parentes no Río Búbal da Barrela. Presidiu o Curmán Maior Benigo axudado polos tres padriños, Manolo-Lina-Pilar. Moi boa comida e excelente conversa e ambiente, os primeiros en marchar, coma sempre, os que estaban de garda nos Parentes, que as vacas non entenden de festas.

Vaca

2011-08-09T09:38:00.001+02:00

Pinchar na vaca

Turismo por Carballedo

2011-08-08T12:17:00.000+02:00

Está moi ben poder ter vacacións e desconectar do de todos os días e ver novos sitios. Aínda que aquí na nosa zona temos tamén sitios ben bonitos, coma este da Peneda do Graúllo, impresionante, xa quixeran ter na costa un cantil coma este. E ademais ten ao lado unha boa fervenza, e tamén un regato para se bañar ademais de fermosas vistas sobre o río Miño.

Máis do mesmo

2011-08-05T18:53:00.000+02:00

O prezo do leite en Galicia sobe, pero aínda é o máis baixo de Europa

O prezo medio entre xullo de 2009 e maio de 2011 foi de 28,84 euros por cada 100 quilos, por debaixo do resto de España e dos cinco grandes produtores europeos

Boas e malas noticias para o sector lácteo en Galicia. Entre xullo de 2009 e maio de 2011, o prezo do leite na comunidade incrementouse un 11,26%, un incremento superior ao do resto do Estado español (8,04%). Así, o valor de cada 100 quilos de leite pasou nese periodo de tempo dos 25,05 euros a 30,14. Sen embargo, este repunte non foi dabondo para conseguir que Galicia siga sendo o gran produtor lácteo europeo que menos recibe pola venda do leite, segundo se desprende dun informe elaborado por Unións Agrarias (UU AA).

En Portugal sitúase en 28,89 euros, fronte aos 29,45 de España ou os 31,92 euros de Alemaña. O maior incremento dos prezos na nosa comunidade rexistrouse entre a primavera e o outono de 2010, no que se pasou de 27,95 euros por cada 100 quilos a casi 31 euros. Neste momentos Galicia (30,14 euros) sitúase nun nivel similar ao de España (30,49), Portugal (30,58) e Francia (30,88). A moita máis distancia atópanse Alemaña (34,44), Dinamarca (36,34) e Holanda (38). Precisamente son os produtores que maior remuneración obteñen (Holanda, Dinamarca e Alemaña) os que máis aceleraron esa recuperación dos prezos neste dous últimos anos. En Alemaña, por exemplo, o incremento foi de case o 43%.

Información collida do Xornal.com (antes Xornal de Galicia en papel)

Non son boas noticias, non...

2011-07-31T11:21:00.000+02:00

O CAMPO AFÚNDESEOs gandeiros galegos xa están á cola no prezo do seu leite

Cobran 700 euros menos ao mes que en Asturias por unha granxa similar

(Ler toda a noticia en La Voz de Galicia)

Tempos cambiados?

2011-07-30T22:34:00.001+02:00

Vendo isto que topou hoxe o Xan na cerrada de Paramios (Trasar de Carballo) pensamos se non andarán os tempos cambiados... porque isto non sería máis ben no outono?

O monte do Faro

2011-07-28T15:56:00.000+02:00

Mentres andamos recollendo na herba seca estes días vemos sempre o Faro e lembramos aquilo de: catro columnas ten o ceo: Faro, Farelo, Pico Sacro e Bocelo

Pan de Cea: o forno do Eliseo

2011-07-24T12:53:00.000+02:00

Hoxé ás 11:30 na TVG botaron un anaco coa muller e a filla repartindo o pan e falando do oficio de panadeiras, e víronse deixando o pan no Berrello e no Río Búbal da Barrela. Fan un pan moi rico. Tamén o facía hai anos a señora Socorro e viña a Trasar nunha mula traer o pan para a Mamacarmen, o tío Benigno, a señora Anuncia...

Outro triunfador da Barrela, o José Ignacio

2011-07-22T10:11:00.001+02:00

Os Parentes sempre nos alegramos dos éxitos dos nosos veciños e que leven con orgullo o nome desta terra na que traballamos polo mundo adiante. Hoxe lendo o Progreso (ver artigo) atopamos unha longa entrevista co José Ignacio... cantas veces entramos no bar do seu avó botar unha quiniela, tomar un café, agardar pola Directa...

Subida automobilistica a Chantada

2011-07-16T11:52:00.000+02:00

Di prensa que unhas 30.000 persoas van presencias a Subida desta fin de semana. E onde se vai meter tanta xente? Nós recomendamos as muras do Paco do Guerra que teñen unhas vistas excelentes. E se está el alí na adega aínda pode convidar a un vasiño de auga se hai sede.

Mañá é o Carmen

2011-07-15T09:41:00.000+02:00

Grande día, o máis grande, para os mariñeiros. Tamén os gandeiros coma os Parentes, porque Carmen era a nosa avoa (a Carmiña de Baixo), Carmén era a nai do Alfonso. E na casa de Baixo están a Maricarmen e a Carmen. E en Torrejón saudamos a Carmen que coida o tío José. Así que os nosos agarimos para todas as Carmes. Que teñan un bo día. E de foto a Carmiña de Baixo cos seus netos hai unha chea de anos

O alto Fran Vázquez de Saramagal

2011-07-13T21:54:00.000+02:00

Di hoxe un diario que o nativo de Saramagal-Carballedo Fran Vázquez (ese que xoga tan ben ao baloncesto no Barcelona) vai dar o pregón das festas en Santiago de Compostela. E igual llo fan dar na torre da catedral para ver se el que é tan alto consegue ver onde esconderon os ladróns o Códice Calixtino ese do que tanto se fala. Consultado o péndulo di que o libro está moi lonxe, mesmo puido chegar ata Budapest.

Esperamos que o correspondente dos Parentes e especialista en baloncesto Paulo nos informe de como foi o pregón do día 21.

A ribeira do Xan

2011-07-12T09:56:00.000+02:00

Vista a foto non ten mala pinta

Nosa Señora da Franqueira

2011-07-10T22:40:00.000+02:00

Hoxe a Pilar escoitou unha misa na Nosa Señora da Fonte da Franqueira e tamén lle pediu unha gracia, que seica é moi avogosa

San Cristovo de Lobelle

2011-07-10T22:10:00.000+02:00

Cruz, farois, cura, gaiteiros, feligreses, todo na procesión de San Cristovo á hora de bendecir os coches. Non faltou un pouco de humor cando o "Padre" tamen bendiciu a algún feligrés que non era coche.

Outras dúas cousas...

2011-07-07T22:48:00.000+02:00

Ata 31 cegoñas contamos hoxe nun prado no que andabamos coa herba seca

E por outra banda, aquí temos o Curmán Maior pronunciando unhas palabriñas na homenaxe que os seus amigos lle fixeron en Noia

Comunión

2011-07-06T15:36:00.000+02:00

Velaquí as fotos da comunión en Lugo o domingo